– Gode hus for bebuarane
I desse dagar flyttar dei første bebuarane inn i dei nye omsorgsbustadane på Eid. – Vi har fått bygg som er gode både for dei som skal bu og arbeid der, seier prosjektleiar Torfinn Myklebust i Stad kommune.
Gravdal Bygg vann konkurransen om å få bygge 11 omsorgsbustader og administrasjonsbygg på tilsaman 1800 kvm like ved sentrum på Nordfjordeid. Dette er Gravdal Bygg sitt første prosjekt i massivtre. Veggane i heiltre kjem ferdig som byggesett og gir robuste einigar.
– Byggeperioden har vore ein læringsprosess både for oss og Gravdal Bygg. Arbeidet er veldig greitt utført, og utforminga svarer fullt ut til forventningane. Vi har fått bygg i robust materiale, det var det vi ønskte, seier Myklebust.
Corona-situasjonen har stukke nokre kjeppar i hjula i byggeperioden, men med intens jobbing i innspurten vart bygga klare til avtalt tid. Forrige fredag var det høgtideleg overlevering med kakefest og ordføraren på plass.
– Det er har vore ein spennande og lærerik prosess for oss å bygge i massivtre. Ei positiv erfaring som vi vil ha nytte av ved seinare prosjekt, seier dagleg leiar Sverre M. Stensæth i Gravdal Bygg.
– Vi opplever at det er godt inneklima og gode lydforhold i bygga. No gjenstår det å sjå korleis bebuarane vil trivast, seier Myklebust.
